மேற்கிந்திய மகளிர் கிரிக்கெட் அணி இலங்கைக்கான சுற்றுப் போட்டிகளுக்காக இன்று காலை கட்டுநாயக்க விமான நிலையத்தை வந்தடைந்துள்ளது.
எமிரேட்ஸ் எயார்லைன்ஸ் விமானமான EK-650 மூலம் துபாயில் இருந்து காலை 08.40 மணியளவில் கட்டுநாயக்க விமான நிலையத்தை வந்தடைந்த இந்த கிரிக்கெட் அணியை வரவேற்பதற்காக இலங்கை கிரிக்கெட் நிறுவனத்தின் அதிகாரிகள் குழு விமான நிலையத்திற்கு சென்றிருந்தது
இவர்கள் எதிர்வரும் 15, 18 மற்றும் 21 ஆம் திகதிகளில் நடைபெறவுள்ள மூன்று ஒரு நாள் மட்டுப்படுத்தப்பட்ட ஓவர் போட்டிகளில் பங்கேற்கவுள்ளதோடு, அந்த போட்டிகள் காலி சர்வதேச மைதானத்தில் நடைபெறவுள்ளன.
இதற்கு மேலதிகமாக எதிர்வரும் 24, 26 மற்றும் 28ஆம் திகதிகளில் ஹம்பாந்தோட்டை சர்வதேச கிரிக்கெட் மைதானத்தில் மேலும் 03 T20 போட்டிகள் நடைபெறவுள்ளமையும் குறிப்பிடத்தக்கது.
