துபாயில் நேற்று இரவு நடைபெற்ற 2025 ஆசியக் கிண்ணத்தின் சுப்பர் 4 சுற்றுப் போட்டியில், பங்களாதேஷை 11 ஓட்டங்கள் வித்தியாசத்தில் வீழ்த்தி பாகிஸ்தான் அணி இறுதிப் போட்டிக்கு தகுதி பெற்றது.
இந்த வெற்றியின் மூலம், பாகிஸ்தான் ஞாயிற்றுக்கிழமை (28) நடைபெறும் இறுதிப் போட்டியில் இந்தியாவை எதிர்கொள்ளும்.
குறிப்பிடத்தக்க வகையில் 17 ஆசியக் கிண்ணப் போட்டிகளில் முதல் முறையாக இந்தியாவும் பாகிஸ்தானும் இறுதிப் போட்டியில் மோதுகின்றன.
நேற்றிரவு ஆரம்பமான மெய்நிகர் அரையிறுதிப் போட்டியில் முதலில் பந்து வீசத் தேர்ந்தெடுத்த பங்களாதேஷ் அணி, குறிப்பாக முதல் 10 ஓவர்களில் அற்புதமாக பந்துப் பரிமாற்றத்தை மேற்கொண்டது.
ஒரு கட்டத்தில் பாகிஸ்தானை 5 விக்கெட்டுக்கு 49 ஓட்டங்களை மாத்திரமே எடுத்திருந்தது.
எனினும், மொஹமட் ஹாரிஸ் (31), மொஹமட் நவாஸ் (25) மற்றும் ஷஹீன் அப்ரிடி (19) ஆகியோர் குறிப்பிடத்தக்க பங்களிப்பினை துடுப்பாட்டத்தில் வழங்கினர்.
இதனால், சல்மான் ஆகா தலைமையிலான அணியானது 20 ஓவர்களில் எட்டு விக்கெட்டுகளை இழந்து 135 ஓட்டங்களை எடுத்தது.
பதிலுக்கு, பாகிஸ்தான் அணி சிறப்பான பந்து வீச்சை வெளிப்படுத்தியது.
இதனால், 136 ஓட்டங்களை நோக்கி பதிலுக்கு துடுப்பெடுத்தாடிய ஜாக்கர் அலி தலைமையிலான அணியால் ஒருபோதும் சரியான வேகத்தை எட்ட முடியவில்லை.
பாகிஸ்தானின் இடைவிடாத அழுத்தம் மற்றும் கூர்மையான பந்துவீச்சு இறுதியாக பங்களாதேஷை 9 விக்கெட்டுகளுக்கு 124 ஓட்டங்களுக்குள் கட்டுப்படுத்தியது.
இறுதியில் அவர்கள் 11 ஓட்டங்கள் வித்தியாசத்தில் வீழ்ந்தனர்.
ஷாஹீன் அப்ரிடி மற்றும் ஹாரிஸ் ரவூஃப் இருவரும் தலா மூன்று விக்கெட்டுகளை வீழ்த்தி சிறப்பான ஆட்டத்தை வெளிப்படுத்தினர்.
அதே நேரத்தில் துடுப்பாட்டத்தில் பங்களாதேஷுக்காக ஷமிம் ஹொசைன் 30 ஓட்டங்களை அதிகபடியாக எடுத்தார்.
துடுப்பாட்டம் மற்றும் பந்து வீச்சில் சிறந்து விளங்கிய ஷஹீன் அப்ரிடி ஆட்ட நாயகனாக தேர்வு செய்யப்பட்டார்.
இதற்கிடையில், இறுதிப் போட்டிக்கு முந்தைய மற்றொரு சூப்பர் ஃபோர் போட்டியில், இந்தியா இன்று துபாயில் நடைபெறும் மூன்றாவது ஆட்டத்தில் இலங்கையை எதிர்கொள்ளவுள்ளமையும் குறிப்பிடத்தக்கது.
