மத்திய கிழக்கில் இஸ்ரேல், ஈரான் மற்றும் லெபனான் இடையிலான போர் தீவிரமடைந்துள்ள நிலையில்,
ஈரானின் துணை இராணுவப் படையான ‘பசிஜ்’ (Basij) அமைப்பின் தளபதி குலாம்ரேசா சொலைமானி (Gholamreza Soleimani), தெஹ்ரானின் மையப்பகுதியில் இஸ்ரேல் நடத்திய வான்வழித் தாக்குதலில் கொல்லப்பட்டதாக இஸ்ரேலிய இராணுவம் உறுதிப்படுத்தியுள்ளது.
சொலைமானியின் உயிரிழப்பு ஈரானின் தலைமைத்துவக் கட்டமைப்பிற்கு விழுந்த பலத்த அடியாகக் கருதப்படுகிறது.
இருப்பினும், ஈரான் இது குறித்து இதுவரை உத்தியோகபூர்வமாக எவ்விதக் கருத்தும் தெரிவிக்கவில்லை.
இஸ்ரேல் இன்று அதிகாலை ஈரானின் தலைநகர் தெஹ்ரான் மீது புதிய அலைத் தாக்குதல்களை ஆரம்பித்துள்ளது.
இதில் இராணுவக் கட்டளை மையங்கள் மற்றும் ஏவுகணைத் தளங்கள் குறிவைக்கப்பட்டுள்ளன.
இதேவேளை, லெபனான் தலைநகர் பெய்ரூட்டின் மூன்று முக்கிய பகுதிகளில் இஸ்ரேலிய வான்வழித் தாக்குதல்கள் நடத்தப்பட்டுள்ளன.
லெபனான் இராணுவத்தின் கூற்றுப்படி, தெற்கு லெபனானில் கார் மற்றும் மோட்டார் சைக்கிள் மீது நடத்தப்பட்ட தாக்குதலில் ஐந்து லெபனான் இராணுவ வீரர்கள் காயமடைந்துள்ளனர்.
ஈரானிலிருந்து ஏவப்பட்ட ஏவுகணைகள் மற்றும் ட்ரோன்களை ஐக்கிய அரபு அமீரகம் (UAE), சவுதி அரேபியா, கத்தார் மற்றும் குவைத் ஆகிய நாடுகள் இடைமறித்து அழித்துள்ளன.
துபாய் மற்றும் அபுதாபி மீது ஏவப்பட்ட ஏவுகணைகளால் வான்பரப்பு தற்காலிகமாக மூடப்பட்டது.
அபுதாபியில் ஏவுகணை சிதறல்கள் விழுந்ததில் பாகிஸ்தான் பிரஜை ஒருவர் உயிரிழந்துள்ளார்.
தோஹா (Doha) அருகே ஏவுகணைகள் இடைமறிக்கப்பட்டதால் பாரிய வெடிச்சத்தங்கள் கேட்டதாகத் தெரிவிக்கப்பட்டுள்ளது.
இதேவேளை, இந்த யுத்தத்தில் அமெரிக்கா மற்றும் இஸ்ரேலுடன் இணைவதற்குத் தமக்கு எவ்விதத் திட்டமும் இல்லை என ஜெர்மனி திட்டவட்டமாகத் தெரிவித்துள்ளது.
ஈரானால் மூடப்பட்டுள்ள ஹார்முஸ் நீரிணையை (Strait of Hormuz) மீண்டும் திறக்க இராணுவத்தை அனுப்புவதற்கு ஐரோப்பிய ஒன்றிய நாடுகளிடையே எவ்வித விருப்பமும் இல்லை என ஐரோப்பிய ஒன்றியத்தின் வெளியுறவுக் கொள்கை மாநாடு தெரிவித்துள்ளது.
இந்த மோதல் நேட்டோ (NATO) அமைப்புடன் தொடர்புடையது அல்ல என ஜெர்மனி சுட்டிக்காட்டியுள்ளது.
இந்நிலையில் கடந்த மார்ச் 2-ஆம் திகதி முதல் லெபனானில் சுமார் ஒரு மில்லியன் மக்கள் (மக்கள்தொகையில் 19%) இடம்பெயர்ந்துள்ளதாகத் தரவுகள் தெரிவிக்கின்றன.
போர் ஆரம்பமான பிப்ரவரி 28 முதல் இதுவரை ஆயிரக்கணக்கானோர் உயிரிழந்துள்ள நிலையில், பிராந்தியத்தில் மனிதாபிமான நெருக்கடி அதிகரித்துள்ளது.
