ஐக்கிய அரபு அமீரகத்திலிருந்து புறப்பட்ட கார்கோ (சரக்கு) விமானம் ஒன்று, பாகிஸ்தானின், கராச்சிக்கு அருகே செவ்வாய்க்கிழமை (07) இரவு திடீரெனக் கீழே இறங்கியதுடன் விமானப் போக்குவரத்துக் கட்டுப்பாட்டாளர்களுடனான தொடர்பையும் இழந்த நிலையில் மாயமானதாக அதிகாரிகள் தெரிவித்தனர்.
இந்த விமானத்தில் ஐந்து பணிக்குழு உறுப்பினர்கள் இருந்ததாக தெரிவிக்கப்பட்டுள்ளது.
இதையடுத்து அரேபியக் கடலில் தேடுதல் மற்றும் மீட்புப் பணிகள் நடைபெற்று வருவதாகப் பாகிஸ்தானின் விமான நிலைய ஆணையகம் ‘எக்ஸ்’ (X) தளத்தில் பதிவிட்டது.
விமானம் மாயமானதற்கான காரணம் உடனடியாகத் தெரியவரவில்லை.
ஐக்கிய அரபு அமீரகத்தின் ஷார்ஜாவிலிருந்து கராச்சிக்கு சரக்கு விமானமாகச் சென்றுகொண்டிருந்த, கராச்சியைச் சேர்ந்த ‘கே2 ஏர்வேஸ்’ (K2 Airways) நிறுவனத்தின் போயிங் 737 விமானமே இவ்வாறு காணாமல் போயுள்ளது.
