லங்கா பிரீமியர் லீக் ரி-20 தொடரின் 19ஆவது லீக் போட்டியில், தம்புள்ளை அவுரா அணி 20 ஓட்டங்கள் வித்தியாசத்தில் வெற்றிபெற்றது.
இந்த வெற்றியின் மூலம் தம்புள்ளை அவுரா அணி, 12 புள்ளிகளுடன் புள்ளிப்பட்டியலில் முதலிடத்தை பிடித்தது.
கொழும்பு-ஆர். பிரேமதாஸ மைதானத்தில் நடைபெற்றுவரும் இப்போட்டியில், தம்புள்ளை அவுரா அணியும் பி-லவ் கண்டி அணியும் பலப்பரீட்சை நடத்தின. இப்போட்டியில் நாணய சுழற்சியில் வெற்றிபெற்ற பி-லவ் கண்டி அணி, முதலில் களத்தடுப்பை தீர்மானித்தது.
இதன்படி முதலில் துடுப்பெடுத்தாடிய தம்புள்ளை அவுரா அணி, நிர்ணயிக்கப்பட்ட 20 ஓவர்கள் நிறைவில், 7 விக்கெட்டுகள் இழப்புக்கு 162 ஓட்டங்களை பெற்றுக்கொண்டது. இதில் அணியின் அதிகப்பட்ச ஓட்டங்களாக, அவிஷ்க பெனார்டோ 41 ஓட்டங்களையும் பென் மெக்டர்மோட் 37 ஓட்டங்களையும் பெற்றுக்கொண்டனர்.
பி-லவ் கண்டி அணியின் பந்துவீச்சில், நுவான் பிரதீப் 3 விக்கெட்டுகளையும் முஜிப் உர் ரஹ்மான் 2 விக்கெட்டுகளையும் சத்துரங்கடி சில்வா மற்றும் வனிந்து ஹசரங்க ஆகியோர் தலா 1 விக்கெட்டினையும் வீழ்த்தினர்.
இதனைத்தொடர்ந்து 163 ஓட்டங்கள் என்ற வெற்றி இலக்கை நோக்கி பதிலுக்கு களமிறங்கிய பி-லவ் கண்டி அணி, 19.4 ஓவர்கள் நிறைவில் அனைத்த விக்கெட்டுகளையும் இழந்து 142 ஓட்டங்களை பெற்றுக்கொண்டது. இதனால், தம்புள்ளை அவுரா அணி 20 ஓட்டங்கள் வித்தியாசத்தில் வெற்றிபெற்றது.
இதன்போது அணியின் அதிகப்பட்ச ஓட்டங்களாக, தினேஷ் சந்திமால் 50 ஓட்டங்களையும் அஞ்சலோ மத்தியூஸ் 26 ஓட்டங்களையும் பெற்றுக்கொண்டனர்.
தம்புளை அவுரா அணியின் பந்துவீச்சில் தனஞ்சய டி சில்வா 4 விக்கெட்டுகளையும் பிரமோத் மதுஷான் 2 விக்கெட்டுகளையும் தாஹானி, ஹெய்டன் கெர் மற்றும் சசித்ர ஜெயதிலக்க ஆகியோர் தலா 1 விக்கெட்டினையும் வீழ்த்தினர்.
