லோர்ட்ஸ் மைதானத்தில் நியூசிலாந்துக்கு எதிரான இங்கிலாந்தின் வெற்றிக்குப் பின்னர், செல்சி இரவு விடுதி ஒன்றில் நள்ளிரவில் நடந்த ஒரு சம்பவத்தைத் தொடர்ந்து, இங்கிலாந்து டெஸ்ட் அணியின் தலைவர் பென் ஸ்டோக்ஸ் ஒரு புதிய சர்ச்சையில் சிக்கியுள்ளார்.
பல இங்கிலாந்து வீரர்கள் டெஸ்ட் வெற்றியைக் கொண்டாட வெளியே சென்றிருந்த நிலையில், திங்கட்கிழமை (08) அதிகாலை இந்தச் சம்பவம் நிகழ்ந்தது.
நள்ளிரவுக்கு முன்பு ஒரு பெரிய குழுவினர் அங்கு இருந்ததாகக் கூறப்பட்டாலும், ஸ்டோக்ஸும் வேகப்பந்து வீச்சாளர் கஸ் அட்கின்சனும், அணியால் அண்மையில் அறிமுகப்படுத்தப்பட்ட நள்ளிரவு ஊரடங்கு உத்தரவையும் மீறி வெளியே தங்கியிருந்ததாகத் தெரிகிறது.
அவர்களின் இந்த நடவடிக்கை இங்கிலாந்து கிரிக்கெட் வாரியத்தின் விதிமுறைகளை மீறலாக பார்க்கப்பட்டு விசாரணையை எதிர்கொள்கின்றனர்.
அவர்கள் மீதான குற்றச்சாட்டு நிரூபணமானால் ஜூன் 17 அன்று கியா ஓவலில் தொடங்கும் இரண்டாவது டெஸ்ட் போட்டியில் இருந்து இருவரும் நீக்கப்படுவார்கள் என்று எதிர்பார்க்கப்படுகிறது.
ஸ்டோக்ஸின் அந்தஸ்துக்கு இது ஒரு கடுமையான நடவடிக்கையாகும், மேலும் இது அவரது தலைமைப் பதவியைக் கேள்விக்குறியாக்கும்.
அவுஸ்திரேலியாவில் ஆஷஸ் தொடரில் 4-1 என்ற கணக்கில் படுதோல்வி அடைந்தபோது, அணியின் குடிப்பழக்கத்திற்காக விமர்சிக்கப்பட்ட சம்பவத்திற்கு சில மாதங்களுக்குப் பிறகு இந்த சர்ச்சை எழுந்துள்ளது.
