உலகக் காற்பந்து ரசிகர்களின் பெரும் எதிர்பார்ப்புக்கு மத்தியில் விறுவிறுப்பாக நடைபெற்று வரும் 2026 உலகக் கிண்ணக் காற்பந்துத் தொடரின் (FIFA World Cup 2026) குழு நிலைப் போட்டியொன்றில், துருக்கி அணியை 2-0 என்ற கோல் கணக்கில் வீழ்த்தி அவுஸ்திரேலிய அணி அபார வெற்றியைப் பதிவு செய்துள்ளது.
‘D’ குழுவிற்கான இப்போட்டியில் ஆரம்பம் முதலே இரு அணிகளும் கோல் போடுவதற்காகத் தீவிரமாகப் போராடினின. எனினும், அவுஸ்திரேலிய வீரர்களின் சிறப்பான பந்துப் பரிமாற்றங்கள் அவர்களுக்குச் சாதகமாக அமைந்தன.
போட்டியின் முதல் பாதியில் ஆதிக்கம் செலுத்திய அவுஸ்திரேலிய அணி, 27ஆவது நிமிடத்தில் தனது முதல் கோலைப் பதிவு செய்து அசத்தியது.
அவுஸ்திரேலியாவின் இளம் நட்சத்திர வீரரான நேஸ்டோரி இரான்குண்டா (Nestory Irankunda)இந்த கோலைப் பெற்றுக் கொடுத்து அணியை முன்னிலைப்படுத்தினார்.
இதனைத் தொடர்ந்து, முதற்பாதியின் முடிவில் அவுஸ்திரேலிய அணி 1-0 என்ற கணக்கில் முன்னிலையில் இருந்தது.
போட்டியின் இரண்டாவது பாதியில் சரிவிலிருந்து மீள துருக்கி அணி கடுமையான உத்திகளைக் கையாண்ட போதிலும், அவுஸ்திரேலியாவின் பலமான தடுப்பாட்டத்தை அவர்களால் தகர்க்க முடியவில்லை.
தொடர்ந்து திறம்பட விளையாடிய அவுஸ்திரேலிய அணி, போட்டியின் 75ஆவது நிமிடத்தில் தனது இரண்டாவது கோலையும் மிக நேர்த்தியாகப் பதிவு செய்து வெற்றியைத் தன்வசப்படுத்தியது.
இறுதியில், நிர்ணயிக்கப்பட்ட நேர முடிவில் அவுஸ்திரேலிய அணி 2-0 என்ற கோல் கணக்கில் துருக்கியை வீழ்த்தி முழுமையான புள்ளிகளைப் பெற்றது.
இந்தத் தீர்க்கமான வெற்றியின் மூலம் ‘D’ குழுவின் புள்ளிகள் பட்டியலில் அவுஸ்திரேலிய அணி 4 புள்ளிகளுடன் இரண்டாம் இடத்திற்கு அதிரடியாக முன்னேறியுள்ளது.
இதேவேளை, இக்குழுவின் முதலிடத்தில் அமெரிக்க (USA) அணி நீடிப்பதோடு, தோல்வியடைந்த துருக்கி அணி அடுத்த சுற்றுக்கான வாய்ப்பை உறுதி செய்ய தனது அடுத்த போட்டியில் வெல்ல வேண்டிய கட்டாயத்திற்குத் தள்ளப்பட்டுள்ளது.
