கிராண்ட்ஸ்லாம் போட்டிகளில் ஒன்றான பிரெஞ்ச் ஓபின் டென்னிஸ் தொடர் பாரிசில் நடந்து வருகிறது. இதில் பெண்கள் ஒற்றையர் பிரிவில் நேற்று நடந்த காலலிறுதி ஆட்டம் ஒன்றில் உலகத் தரவரிசையில் 85 ஆவது இடம் வகிக்கும் சுலோவேனியாவின் தமரா ஸிடன்செக் 7-5, 4-6, 8-6 என்ற செட் கணக்கில் 35 ஆம் நிலை வீராங்கனையான ஸ்பெயினின் பாலா படோசாவை வீழ்த்தி அரையிறுதிக்குள் நுழைந்தார். கிராண்ட்ஸ்லாம் போட்டிகளில் சுலோவேனியா நாட்டவர் ஒருவர் அரையிறுதியை எட்டியிருப்பது இதுவே முதல்முறையாகும்.
மற்றொரு ஆட்டத்தில் 32 ஆம் நிலை வீராங்கனையான ரஷியாவின் அனஸ்டசியா பாவ்லிசென்கோவா 6-7 (2-7), 6-2, 9-7 என்ற செட் கணக்கில் கஸகஸ்தான் நாட்டின் எலினா ரைபகினாவை வீழ்த்தி அரையிறுதியை எட்டினார். விறுவிறுப்பான இந்த ஆட்டம் 2 மணித்தியாலங்கள் 33 நிமிடங்கள் வரை நீடித்தது. கிராண்ட்ஸ்லாமில் முதல் முறையாக அரையிறுதிக்குள் அடியெடுத்து வைத்துள்ள 29 வயதான அனஸ்டசியா பாவ்லிசென்கோவா அடுத்து 23 வயதான ஸிடன்செக்குடன் மோதுகிறார்.
நேற்று முன்தினம் இரவு நடந்த 4 ஆவது சுற்று ஆட்டம் ஒன்றில் 9 ஆம் நிலை வீராங்கனையும், நடப்பு சம்பியனுமான போலந்தின் இகா ஸ்வியாடெக் 6-3, 6-4 என்ற நேர் செட்டில் உக்ரைனின் மார்டா கோஸ்டியுக்கை வென்று காலிறுதிக்கு முன்னேறினார்.
