கிரிக்கெட் இரசிகர்கள் ஆவலுடன் எதிர்பார்த்துக் காத்திருந்த ஏழாவது ரி-20 உலகக்கிண்ண தொடருக்கான போட்டி அட்டவணையை சர்வதேச கிரிக்கெட் சபை வெளியிட்டுள்ளது.
நடப்பு ஆண்டுக்கான ரி-20 உலகக்கிண்ண தொடர், எதிர்வரும் ஒக்டோபர் மாதம் 17ஆம் திகதி முதல் நவம்பர் 14ஆம் திகதி வரை ஐக்கிய அரபு அமீரகம் (டுபாய், அபுதாபி, சார்ஜா) மற்றும் ஓமனில் நடைபெறவுள்ளது.
முதல் சுற்றில் (தகுதி சுற்று) 8 அணிகள் விளையாடும். இதில் இருந்து 4 அணிகள் இரண்டாவது சுற்றான சுப்பர் 12 சுற்றுக்கு முன்னேறும். 8 நாடுகள் நேரடியாக இரண்டாவது சுற்றில் விளையாடும்.
முதல் சுற்றில் விளையாடும் 8 அணிகளும் 2 பிரிவாக பிரிக்கப்பட்டுள்ளது. ஏ பிரிவில் இலங்கை, அயர்லாந்து, நமீபியா, நெதர்லாந்து ஆகிய நாடுகளும், பி பிரிவில் பங்களாதேஷ், ஓமன், ஸ்கொட்லாந்து, பப்புவா நியூகுனியா அணிகள் ஆகிய நாடுகளும் இடம்பெற்றுள்ளன.
ஒக்டோபர் 17ஆம் திகதி ஓமனில் நடைபெறும் ஆரம்ப போட்டியில், ஓமன்- பப்புவா நியூகுனியா மோதுகின்றன. மற்றொரு போட்டியில் பங்களாதேஷ்- ஸ்கொட்லாந்து அணிகள் விளையாடுகின்றன.
22ஆம் திகதியுடன் முதல் சுற்றுப் போட்டிகள் முடிவடைகிறது. 2 பிரிவுகளில் இருந்தும் முதல் 2 இடங்களை பிடிக்கும் அணிகள் இரண்டாவது சுற்றுக்கு தகுதி பெறும்.
சுப்பர் 12 போட்டிகள் ஒக்டோபர் 23ஆம் திகதி ஆரம்பமாகின்றது. இதில் விளையாடும் 12 அணிகளும் 2 பிரிவாக பிரிக்கப்பட்டுள்ளன.
குழு ஒன்றில் நடப்பு சம்பியன் மேற்கிந்திய தீவுகள், இங்கிலாந்து, அவுஸ்ரேலியா, தென்னாபிரிக்கா மற்றும் தகுதி சுற்றுப் போட்டிகளில் தேர்வாகும் இரு அணிகள்.
குழு இரண்டில் இந்தியா, பாகிஸ்தான், நியூஸிலாந்து, ஆப்கானிஸ்தான் மற்றும் தகுதி சுற்றுப் போட்டிகளில் தேர்வாகும் இரு அணிகள்.
நவம்பர் 8ஆம் திகதியுடன் லீக் போட்டிகள் முடிவடைகின்றது. இதன் முடிவில் 2 பிரிவில் இருந்தும் முதல் இரண்டு இடங்களை பிடிக்கும் அணிகள் அரையிறுதிக்கு தகுதி பெறும்.
10ஆம் மற்றும் 11ஆம் திகதிகளில் அரையிறுதி போட்டிகள் நடைபெறுகிறது. இறுதிப்போட்டி நவம்பர் 14ஆம் திகதி டுபாயில் நடைபெறுகின்றது.
ஏழாவது ரி-20 உலகக்கிண்ண தொடர் கடந்த ஆண்டு அவுஸ்ரேலியாவில் நடைபெற இருந்தது. ஆனால் கொரோனா வைரஸ் தொற்று பாதிப்பு காரணமாக இத்தொடர் இரத்து செய்யப்பட்டு தொடரை நடத்தும் உரிமம் 2022ஆம் ஆண்டு அவுஸ்ரேலியாவுக்கு வழங்கப்பட்டது.
இதனால், ஏழாவது ரி-20 உலகக்கிண்ண தொடரை நடத்தும் உரிமம் இந்தியாவுக்கு வழங்கப்பட்டது. தற்போது இந்தியாவிலும் வைரஸ் தொற்று பாதிப்பு இருப்பதால், இத்தொடர் ஐக்கிய அரபு அமீரகத்துக்கு மாற்றப்பட்டது.
இந்த தொடர், இந்தியாவில் நடைபெறாவிட்டாலும் இந்தியக் கிரிக்கெட் கட்டுப்பாட்டு சபையின் சார்பாகவே நடைபெறுகின்றது.
