பங்களாதேஷ் கிரிக்கெட் அணிக்கெதிரான இரண்டாவது ரி-20 போட்டியில், மேற்கிந்திய தீவுகள் அணி 35 ஓட்டங்கள் வித்தியாசத்தில் வெற்றிபெற்றுள்ளது.
டோமினிகா மைதானத்தில் நேற்று (ஞாயிற்றுக்கிழமை) நடைபெற்ற இப்போட்டியில், நாணய சுழற்சியில் வெற்றிபெற்ற மேற்கிந்திய தீவுகள் அணி முதலில் துடுப்பெடுத்தாட தீர்மானித்தது.
இதன்படி முதலில் துடுப்பெடுத்தாடிய மேற்கிந்திய தீவுகள் அணி, நிர்ணயிக்கப்பட்ட 20 ஓவர்கள் நிறைவில் 5 விக்கெட்டுகள் இழப்புக்கு 195 ஓட்டங்களை பெற்றுக்கொண்டது.
இதில் அணியின் அதிகப்பட்ச ஓட்டங்களாக, ரொவ்மன் பவல் ஆட்டமிழக்காது 61 ஓட்டங்களையும் பிரெண்டன் கிங் 57 ஓட்டங்களையும் பெற்றுக்கொண்டனர்.
பங்களாதேஷ் கிரிக்கெட் அணியின் பந்துவீச்சில், சொரிபுல் இஸ்லாம் 2 விக்கெட்டுகளையும் மெயிடி ஹசன், சகிப் அல் ஹசன் மற்றும் மொசடெக் ஹொசைன் ஆகியோர் தலா 1 விக்கெட்டினையும் வீழ்த்தினர்.
இதனைத்தொடர்ந்து 196 என்ற வெற்றி இலக்கை நோக்கி பதிலுக்கு களமிறங்கிய பங்களாதேஷ் அணியால், நிர்ணயிக்கப்பட்ட 20 ஓவர்கள் நிறைவில் 6 விக்கெட்டுகள் இழப்புக்கு 158 ஓட்டங்களை மட்டுமே பெற முடிந்தது. இதனால், மேற்கிந்திய தீவுகள் அணி 35 ஓட்டங்கள் வித்தியாசத்தில் வெற்றிபெற்றது.
இதன்போது அணியின் அதிகப்பட்ச ஓட்டங்களாக, சகிப் அல் ஹசன் 68 ஓட்டங்களையும் அபீப் ஹொசைன் 34 ஓட்டங்களையும் பெற்றுக்கொண்டனர்.
மேற்கிந்திய தீவுகள் அணியின் பந்துவீச்சில், ஒபெட் மெக்கொய் மற்றும் ரொமாறியோ செப்பர்ட் ஆகியோர் தலா 2 விக்கெட்டுகளையும் அகீல் ஹொசைன் மற்றும் ஒடியன் ஸ்மித் ஆகியோர் தலா 1 விக்கெட்டினையும் வீழ்த்தினர்.
இப்போட்டியின் ஆட்டநாயகனாக, 28 பந்துகளில் 6 சிக்ஸர்கள் 2 பவுண்ரிகள் அடங்களாக ஆட்டமிழக்காது 61 ஓட்டங்களை பெற்றுக்கொண்ட ரொவ்மன் பவல் தெரிவுசெய்யப்பட்டார்.
