அயர்லாந்து கிரிக்கெட் அணிக்கெதிரான மூன்றாவது ஒருநாள் போட்டியில், நியூஸிலாந்து கிரிக்கெட் அணி ஒரு ஓட்டத்தால் திரில் வெற்றிபெற்றுள்ளது.
இந்த வெற்றியின் மூலம் மூன்று போட்டிகள் கொண்ட ஒருநாள் தொடரை, 3-0 என்ற கணக்கில் நியூஸிலாந்துக் கிரிக்கெட் அணி கைப்பற்றியுள்ளது.
டப்ளின் மைதானத்தில் நேற்று (வெள்ளிக்கிழமை) நடைபெற்ற இப்போட்டியில், நாணய சுழற்சியில் வெற்றிபெற்ற நியூஸிலாந்து அணி, முதலில் துடுப்பெடுத்தாட தீர்மானித்தது.
இதன்படி முதலில் துடுப்பெடுத்தாடிய நியூஸிலாந்து அணி, நிர்ணயிக்கப்பட்ட 50 ஓவர்கள் நிறைவில், 6 விக்கெட்டுகள் இழப்புக்கு 360 ஓட்டங்களை பெற்றுக்கொண்டது.
இதில் அணியின் அதிகப்பட்ச ஓட்டங்களாக, மார்டின் கப்டில் 115 ஓட்டங்களையும் ஹென்ரி நிக்கோல்ஸ் 79 ஓட்டங்களையும் பெற்றுக்கொண்டனர்.
அயர்லாந்து அணியின் பந்துவீச்சில், ஜோசுவா லிட்டில் 2 விக்கெட்டுகளையும் கிரைஜ் யங், கர்டிஸ் கெம்பர் மற்றும் டிலானி ஆகியோர் தலா 1 விக்கெட்டினையும் வீழ்த்தினர்.
இதனைத்தொடர்ந்து 361 என்ற வெற்றி இலக்கை நோக்கி பதிலுக்கு களமிறங்கிய அயர்லாந்து அணியால், 50 ஓவர்கள் நிறைவில் 9 விக்கெட்டுகள் இழப்புக்கு 359 ஓட்டங்களை மட்டுமே பெற முடிந்தது. இதனால், நியூஸிலாந்து கிரிக்கெட் அணி ஒரு ஓட்டத்தால் திரில் வெற்றிபெற்றது.
அயர்லாந்து அணியின் அதிகப்பட்ச ஓட்டங்களாக, போல் ஸ்டெயர்லிங் 120 ஓட்டங்களையும் ஹரி டெக்டர் 108 ஓட்டங்களையும் பெற்றுக்கொண்டனர்.
நியூஸிலாந்து அணியின் பந்துவீச்சில், மெட் ஹென்ரி 4 விக்கெட்டுகளையும் மிட்செல் சான்ட்னர் 3 விக்கெட்டுகளையும் பிளாயர் டிக்னர் 1 விக்கெட்டினையும் வீழ்த்தினர்.
இப்போட்டியின் ஆட்டநாயகனாக மார்டின் கப்டிலும், தொடரின் நாயகனாக மைக்கேல் பிரெஸ்வலும் தெரிவுசெய்யப்பட்டனர்.
