இலங்கை மற்றும் பாகிஸ்தான் அணிகளுக்கிடையிலான இரண்டாவது டெஸ்ட் போட்டியின், மூன்றாம்நாள் ஆட்டம் நிறைவுக்கு வந்துள்ளது.
இதன்படி, இரண்டாவது இன்னிங்ஸிற்காக துடுப்பெடுத்தாடிவரும் இலங்கை அணி, இன்றைய மூன்றாம்நாள் ஆட்டநேர முடிவில் 5 விக்கெட்டுகள் இழப்புக்கு 176 ஓட்டங்களை பெற்றுக்கொண்டது. இதன்படி, இலங்கை கிரிக்கெட் அணி தற்போது, 323 ஓட்டங்கள் முன்னிலையில் உள்ளது.
ஆட்டநேர முடிவில், திமுத் கருணாரத்ன 27 ஓட்டங்களுடனும் தனஞ்சய டி சில்வா 30 ஓட்டங்களுடன் ஆட்டமிழக்காது களத்தில் இருந்தனர்.
காலி சர்வதேச மைதானத்தில் நேற்று முன் தினம் (ஞாயிற்றுக்கிழமை) ஆரம்பமான இப்போட்டியில், நாணய சுழற்சியில் வெற்றிபெற்ற இலங்கை அணி முதலில் துடுப்பெடுத்தாட தீர்மானித்தது.
இதன்படி, முதல் இன்னிங்ஸிற்காக துடுப்பெடுத்தாடிய இலங்கை கிரிக்கெட் அணி, 378 ஓட்டங்களை பெற்றுக்கொண்டது.
இதன்போது அணியின் அதிகப்பட்ச ஓட்டங்களாக, சந்திமால் 80 ஓட்டங்களையும் டிக்வெல்ல 51 ஓட்டங்களையும் பெற்றுக்கொண்டனர்.
பாகிஸ்தான் கிரிக்கெட் அணியின் பந்துவீச்சில், நஷிம் ஷா மற்றும் யாசிர் ஷா ஆகியோர் தலா 3 விக்கெட்டுகளையும் நாஸ் 2 விக்கெட்டுகளையும் நவுமான் அலி 1 விக்கெட்டினையும் வீழ்த்தினர்.
இதனைத்தொடர்ந்து பதிலுக்கு முதல் இன்னிங்சை தொடங்கிய பாகிஸ்தான் அணி, 231 ஓட்டங்களை பெற்றுக்கொண்டது.
இதில் அணியின் அதிகப்பட்ச ஓட்டங்களாக, சல்மன் 62 ஓட்டங்களையும் இமாம் உல் ஹக் 32 ஓட்டங்களையும் பெற்றுக்கொண்டனர்.
இலங்கை கிரிக்கெட் அணியின் பந்துவீச்சில், ரமேஷ் மெண்டிஸ் 5 விக்கெட்டுகளையும் பிரபாத் ஜயசூரிய 3 விக்கெட்டுகளையும் அசித்த பெணார்டோ மற்றும் தனஞ்சய டி சில்வா ஆகியோர் தலா 1 விக்கெட்டினை வீழ்த்தினர்.
இதனைத்தொடர்ந்து, 147 ஓட்டங்கள் முன்னிலையில் தனது இரண்டாவது இன்னிங்சை தொடங்கிய இலங்கை அணி, இன்றைய மூன்றாம்நாள் ஆட்டநேர முடிவில் 5 விக்கெட்டுகள் இழப்புக்கு 176 ஓட்டங்களை பெற்றுக்கொண்டது.
இன்னமும் 5 விக்கெட்டுகள் வசமுள்ள நிலையில், போட்டியின் நான்காம்நாள் ஆட்டத்தை இலங்கை அணி நாளை தொடரவுள்ளது.
