தமிழ்நாடு பிரீமியர் லீக் (TNPL )ரி-20 தொடரின், இறுதிப் போட்டிக்கான இரண்டாவது தகுதிப் போட்டியில் வெற்றிபெற்று லைக்கா கோவை கிங்ஸ் அணி, முதல்முறையாக இறுதிப் போட்டிக்குள் நுழைந்துள்ளது.
கோயம்பத்தூர் மைதானத்தில் நேற்று (வெள்ளிக்கிழமை) நடைபெற்ற இப்போட்டியில், லைக்கா கோவை கிங்ஸ் அணியும் நெல்லை றோயல் கிங்ஸ் அணியும் பலப்பரீட்சை நடத்தின.
எதிர்பார்ப்பு மிக்க இப்போட்டியில் நாணய சுழற்சியில் வெற்றிபெற்ற லைக்கா கோவை கிங்ஸ் அணி, முதலில் களத்தடுப்பை தீர்மானித்தது.
இதன்படி முதலில் துடுப்பெடுத்தாடிய நெல்லை றோயல் கிங்ஸ் அணி, நிர்ணயிக்கப்பட்ட 20 ஓவர்கள் நிறைவில் 6 விக்கெட்டுகள் இழப்புக்கு 208 ஓட்டங்களை பெற்றுக்கொண்டது.
இதில் அணியின் அதிகப்பட்ச ஓட்டங்களாக, சஞ்சய் யாதவ் 55 ஓட்டங்களையும் அபரஜித் 44 ஓட்டங்களையும் பெற்றுக்கொண்டனர்.
லைக்கா கோவை கிங்ஸ் அணியின் பந்துவீச்சில், அபிஷேக் டன்வர் மற்றும் மணிஷ் ரவி ஆகியோர் தலா 2 விக்கெட்டுகளையும் ஷாருக்கான் மற்றும் ஷாய் சுதன் ஆகியோர் தலா 1 விக்கெட்டினையும் வீழ்த்தினர்.
இதனைத்தொடர்ந்து 209 என்ற வெற்றி இலக்கை நோக்கி பதிலுக்கு களமிறங்கிய லைக்கா கோவை கிங்ஸ் அணி, 20 ஓவர்கள் நிறைவில் 8 விக்கெட்டுகள் இழப்புக்கு வெற்றி இலக்கை கடந்தது. இதன்மூலம் லைக்கா கோவை கிங்ஸ் அணி, 2 விக்கெட்டுகளால் வெற்றிபெற்று இறுதிப் போட்டிக்கு முன்னேறியது.
இதன்போது, லைக்கா கோவை கிங்ஸ் அணியின் அதிகப்பட்ச ஓட்டங்களாக, ஷாருக்கான் ஆட்டமிழக்காது 58 ஓட்டங்களையும் ஷாய் சுதர்சன் 53 ஓட்டங்களையும் பெற்றுக்கொண்டனர்.
நெல்லை றோயல் கிங்ஸ் அணியின் பந்துவீச்சில், கார்த்திக் மணிக்கண்டன் 3 விக்கெட்டுகளையும் ஏஸ்வரன் மற்றும் பாபா அப்ராஜித் ஆகியோர் தலா 2 விக்கெட்டுகளையும் ஸ்ரீ நிரஞ்ஜன் 1 விக்கெட்டினையும் வீழ்த்தினர்.
இப்போட்டியின் ஆட்டநாயகாக, 1 விக்கெட்டினையும் ஆட்டமிழக்காது 58 ஓட்டங்களையும் பெற்றுக்கொண்ட லைக்கா கோவை கிங்ஸ் அணியின் தலைவர் ஷாருக்கான் தெரிவுசெய்யப்பட்டார்.
நாளை (ஞாயிற்றுக்கிழமை) கோயம்பத்தூர் மைதானத்தில் நடைபெறும் மகுடத்திற்கான இறுதிப் போட்டியில், லைக்கா கோவை கிங்ஸ் அணி, மூன்று முறை சம்பியன் அணியான சேப்பாக் சுப்பர் கில்லீஸ் அணியை எதிர்கொள்ளவுள்ளது.
