அயர்லாந்துக் கிரிக்கெட் அணிக்கெதிரான இரண்டாவதும் இறுதியுமான ரி-20 போட்டியில், தென்னாபிரிக்கா அணி 44 ஓட்டங்கள் வித்தியாசத்தில் வெற்றிபெற்றது.
இந்த வெற்றியின் மூலம் இரண்டு போட்டிகள் கொண்ட ரி-20 தொடரை, 2-0 என்ற கணக்கில் தென்னாபிரிக்கா அணி கைப்பற்றியது.
பிரிஸ்டோல் மைதானத்தில் நேற்று (வெள்ளிக்கிழமை) நடைபெற்ற இப்போட்டியில், நாணய சுழற்சியில் வெற்றிபெற்ற அயர்லாந்து அணி, முதலில் களத்தடுப்பை தீர்மானித்தது.
இதன்படி முதலில் துடுப்பெடுத்தாடிய தென்னாபிரிக்கா அணி, நிர்ணயிக்கப்பட்ட 20 ஓவர்கள் நிறைவில், 6 விக்கெட்டுகள் இழப்புக்கு 182 ஓட்டங்களை பெற்றுக்கொண்டது.
இதில் அணியின் அதிகப்பட்ச ஓட்டங்களாக, ரீஸா ஹென்ரிக்ஸ் 42 ஓட்டங்களையும் மில்லர் ஆட்டமிழக்காது 34 ஓட்டங்களையும் பெற்றுக்கொண்டனர்.
அயர்லாந்துக் கிரிக்கெட் அணியின் பந்துவீச்சில், டெலானி 2 விக்கெட்டுகளையும் மெக்பிரைன், மார்க் அடாயர், மெக்கார்தி மற்றும் ஜோசுவா லிட்டில் ஆகியோர் தலா 1 விக்கெட்டினையும் வீழ்த்தினர்.
இதனைத்தொடர்ந்து 183 என்ற வெற்றி இலக்கை நோக்கி பதிலுக்கு களமிறங்கிய அயர்லாந்து அணி, 18.5 ஓவர்கள் நிறைவில் 138 ஓட்டங்களுக்கு சுருண்டது. இதனால், தென்னாபிரிக்கா அணி 44 ஓட்டங்கள் வித்தியாசத்தில் வெற்றிபெற்றது.
இதன்போது அணியின் அதிகப்பட்ச ஒட்டங்களாக, ஹரி டெக்டர் 34 ஓட்டங்களையும் மெக்கார்தி 32 ஓட்டங்களையும் பெற்றுக்கொண்டனர்.
தென்னாபிரிக்க கிரிக்கெட் அணியின் பந்துவீச்சில், வெய்ன் பார்னல் 5 விக்கெட்டுகளையும் டுவைன் பிரிடோரியஸ் 3 விக்கெட்டுகளையும் லுங்கி ங்கிடி மற்றும் டப்ரைஸ் சம்ஸி ஆகியோர் தலா 1 விக்கெட்டினையும் வீழ்த்தினர்.
இப்போட்டியின் ஆட்டநாயகனாக வெய்ன் பார்னல் தெரிவுசெய்யப்பட்டதோடு, தொடரின் நாயகனாக ரீஸா ஹென்ரிக்ஸ் தெரிவுசெய்யப்பட்டார்.
