வீதி பாதுகாப்பு உலகத் தொடர்: பங்களாதேஷ் ஜாம்பவான் அணிக்கெதிரான போட்டியில் அவுஸ்ரேலிய ஜாம்பவான் அணி வெற்றி!

வீதி பாதுகாப்பு உலகத் தொடரின் 11ஆவது லீக் போட்டியில், அவுஸ்ரேலிய ஜாம்பவான் அணி 3 விக்கெட்டுகள் வித்தியாசத்தில் வெற்றிபெற்றது.

இந்தூரில் நேற்று (ஞாயிற்றுக்கிழமை) நடைபெற்ற இப்போட்டியில், அவுஸ்ரேலிய ஜாம்பவான் அணியும் பங்களாதேஷ் ஜாம்பவான் அணியும் பலப்பரீட்சை நடத்தின.

இப்போட்டியில் நாணய சுழற்சியில் வெற்றிபெற்ற அவுஸ்ரேலிய ஜாம்பவான் அணி, முதலில் களத்தடுப்பை தீர்மானித்தது.

இதன்படி முதலில் துடுப்பெடுத்தாடிய பங்களாதேஷ் ஜாம்பவான் அணி, நிர்ணயிக்கப்பட்ட 20 ஓவர்கள் நிறைவில், 9 விக்கெட்டுகள் இழப்புக்கு 158 ஓட்டங்களை பெற்றுக்கொண்டது.

இதன்போது அணியின் அதிகப்பட்ச ஓட்டங்களாக, எலியாஸ் சன்னி ஆட்டமிழக்காது 32 ஓட்டங்களையும் கபாலி மற்றும் சதாத் ஆகியோர் தலா 20 ஓட்டங்களையும் பெற்றுக்கொண்டனர்.

அவுஸ்ரேலிய அணியின் பந்துவீச்சில், பிரட் லீ, நானீஸ், ஹெஸ்டிங்ஸ், வாட்சன், மெக்கெய்ன், ஹோர்லின் மற்றும் ரியர்டன் ஆகியோர் தலா 1 விக்கெட்டினை வீழ்த்தினர்.

இதனைத்தொடர்ந்து 159 என்ற வெற்றி இலக்கை நோக்கி பதிலுக்கு களமிறங்கிய அவுஸ்ரேலிய ஜாம்பவான் அணி, 20 ஓவர்கள் நிறைவில் 7 விக்கெட்டுகள் இழப்புக்கு வெற்றி இலக்கை கடந்தது. இதனால், அவுஸ்ரேலிய ஜாம்பவான் அணி 3 விக்கெட்டுகள் வித்தியாசத்தில் வெற்றிபெற்றது.

இதன்போது அணியின் அதிகப்பட்ச ஓட்டங்களாக, பிரெட் ஹெடின் ஆட்டமிழக்காது 58 ஓட்டங்களையும் ஷேன் வொட்சன் 35 ஓட்டங்களையும் பெற்றுக்கொண்டனர்.

பங்களாதேஷ் ஜாம்பவான் அணியின் பந்துவீச்சில், எலியாஸ் சன்னி 4 விக்கெட்டுகளையும் அப்துல் ரஸாக் 2 விக்கெட்டுகளையும் அப்துல் ஹசன் 1 விக்கெட்டினையும் வீழ்த்தினர்.

இப்போட்டியின் ஆட்டநாயகனாக, 37 பந்துகளில் 4 சிக்ஸர்கள் 3 பவுண்ரிகள் அடங்களாக, ஆட்டமிழக்காது 58 ஓட்டங்களை பெற்றுக்கொண்ட பிரெட் ஹெடின் தெரிவுசெய்யப்பட்டார்.