அவுஸ்ரேலிய அணிக்கெதிரான முதல் டெஸ்ட்: நான்காம் நாளில் மேற்கிந்திய தீவுகள் அணி நிதானம்!

அவுஸ்ரேலியா மற்றும் மேற்கிந்திய தீவுகள் அணிகளுக்கிடையிலான, முதலாவது டெஸ்ட் போட்டியின் நான்காம்நாள் ஆட்டம் நிறைவுக்கு வந்துள்ளது.

இதன்படி, இரண்டாவது இன்னிங்ஸிற்காக துடுப்பெடுத்தாடிவரும் மேற்கிந்திய தீவுகள் அணி, இன்றைய நான்காம்நாள் ஆட்டநேர முடிவில், 3 விக்கெட்டுகள் இழப்புக்கு 193 ஓட்டங்களை பெற்றுள்ளது.

ஆட்டநேர முடிவில், கெய்ல் மேயர்ஸ் ஓட்டமெதுவும் பெறாத நிலையிலும், கிரைஜ் பிரத்வெயிட் 101 ஓட்டங்களுடனும் ஆட்டமிழக்காது களத்தில் இருந்தனர்.

அவுஸ்ரேலியக் கிரிக்கெட் அணியின் 498 என்ற வெற்றி இலக்குடன் ஒப்பிடுகையில், மேற்கிந்திய தீவுகள் அணி, 306 ஓட்டங்கள் பின்னிலையில் உள்ளது.

பெர்த் மைதானத்தில் கடந்த மாதம் 30ஆம் திகதி ஆரம்பமான இப்போட்டியில், நாணய சுழற்சியில் வெற்றிபெற்ற அவுஸ்ரேலியா அணி, முதலில் துடுப்பெடுத்தாட தீர்மானித்தது.

இதன்படி முதலில் துடுப்பெடுத்தாடிய அவுஸ்ரேலியா அணி, 4 விக்கெட்டுகள் இழப்புக்கு 598 ஓட்டங்களை பெற்றிருந்த போது, தனது முதல் இன்னிங்சை நிறுத்திக்கொண்டது.

இதன்போது அணியின் அதிகப்பட்ச ஓட்டங்களாக, மார்னஸ் லபுஸ்சேன் 204 ஓட்டங்களையும் ஸ்டீவ் ஸ்மித் ஆட்டமிழக்காது 200 ஓட்டங்களையும் பெற்றுக்கொண்டனர்.

மேற்கிந்திய தீவுகள் அணியின் பந்துவீச்சில், பிரத்வெயிட் 2 விக்கெட்டுகளையும் ஜெய்டன் சீல்ஸ் மற்றும் கெய்ல் மேயர்ஸ் ஆகியோர் தலா 1 விக்கெட்டினையும் வீழ்த்தினர்.

இதனைத்தொடர்ந்து பதிலுக்கு முதல் இன்னிங்சை தொடங்கிய மேற்கிந்திய தீவுகள் அணி, 283 ஓட்டங்களுக்கு சுருண்டது.

இதன்போது அணியின் அதிகப்பட்ச ஓட்டங்களாக, பிரத்வெயிட் 64 ஓட்டங்களையும் டேகனரின் சந்தர்பால் 51 ஓட்டங்களையும் பெற்றுக்கொண்டனர்.

இதனையடுத்து, 315 ஓட்டங்கள் முன்னிலையில் தனது இரண்டாவது இன்னிங்சை தொடங்கிய அவுஸ்ரேலியா அணி, 2 விக்கெட்டுகள் இழப்புக்கு 182 ஓட்டங்களை பெற்றிருந்த போது, தனது இரண்டாவது இன்னிங்ஸ் ஆட்டத்தை இடைநிறுத்திக்கொண்டது. இதற்கமைய அவுஸ்ரேலிய அணி, மேற்கிந்திய தீவுகள் அணிக்கு 498 ஓட்டங்கள் என்ற வெற்றி இலக்கை நிர்ணயித்தது.

இதில் அணியின் அதிகப்பட்ச ஓட்டங்களாக, லபுஸ்சேகன் ஆட்டமிழக்காது 104 ஓட்டங்களையும் வோர்னர் 48 ஓட்டங்களையும் பெற்றுக்கொண்டனர்.

மேற்கிந்திய தீவுகள் அணியின் பந்துவீச்சில், ரோச் மற்றும் சேஸ் ஆகியோர் தலா 1 விக்கெட்டினை வீழ்த்தினர்.

இதனைத்தொடர்ந்து 498 ஓட்டங்கள் என்ற வெற்றி இலக்கை நோக்கி களமிறங்கிய மேற்கிந்திய தீவுகள் அணி, இன்றைய ஆட்டநேர முடிவில், 3 விக்கெட்டுகள் இழப்புக்கு 193 ஓட்டங்களை பெற்றுள்ளது.

இன்னமும் ஒருநாள் மற்றும் 7 விக்கெட்டுகள் மீதமிருக்க 306 ஓட்டங்கள் என்ற இலக்கை நோக்கி மேற்கிந்திய தீவுகள் அணி, நாளை துடுப்பெடுத்தாடவுள்ளது.