லங்கா பிரீமியர் லீக் ரி-20 தொடரின் 20ஆவது லீக் போட்டியில், தம்புள்ளை ஓரா அணி 4 விக்கெட்டுகள் வித்தியாசத்தில் வெற்றிபெற்றது.
எனினும், அடுத்த சுற்றுக்கான வாய்ப்பை இழந்து தம்புள்ளை ஓரா அணி நடப்பு தொடரிலிருந்து வெளியேறியது.
கொழும்பு- ஆர்.பிரேமதாஸ மைதானத்தில் நேற்று (திங்கட்கிழமை) நடைபெற்ற தொடரின் இறுதி லீக் போட்டியில், தம்புள்ளை ஓரா அணியும் காலி க்ளேடியேட்டர்ஸ் அணியும் மோதின.
இப்போட்டியில் நாணய சுழற்சியில் வெற்றிபெற்ற காலி க்ளேடியேட்டர்ஸ் அணி முதலில் துடுப்பெடுத்தாட தீர்மானித்தது.
இதன்படி முதலில் துடுப்பெடுத்தாடிய காலி க்ளேடியேட்டர்ஸ் அணி, நிர்ணயிக்கப்பட்ட 20 ஓவர்கள் நிறைவில் 8 விக்கெட்டுகள் இழப்புக்கு 129 ஓட்டங்களை பெற்றுக்கொண்டது.
இதில் அணியின் அதிகப்பட்ச ஓட்டங்களாக, நுவனிந்து பெனார்டோ ஆட்டமிழக்காது 63 ஓட்டங்களையும் குசல் மெண்டிஸ் 17 ஓட்டங்களையும் பெற்றுக்கொண்டனர்.
தம்புள்ளை ஓரா அணியின் பந்துவீச்சில், மெத்தியு போர்ட் 4 விக்கெட்டுகளையும் லஹிரு மதுஷங்க, நுர் அஹமட், திலும் சுதீர மற்றும் ரஸா ஆகியோர் தலா 1 விக்கெட்டினை வீழ்த்தினர்.
இதனைத்தொடர்ந்து, 130 என்ற வெற்றி இலக்கை நோக்கி பதிலுக்கு களமிறங்கிய தம்புள்ளை ஓரா அணி, 14.2 ஓவர்கள் நிறைவில் 6 விக்கெட்டுகள் இழப்புக்கு வெற்றி இலக்கை கடந்தது. இதனால், தம்புள்ளை ஓரா அணி 4 விக்கெட்டுகள் வித்தியாசத்தில் வெற்றிபெற்றது.
இதன்போது அணியின் அதிகப்பட்ச ஓட்டங்களாக, மெத்தியு போர்ட் 52 ஓட்டங்களையும் ஜோர்தான் கொஃஸ் 34 ஓட்டங்களையும் பெற்றுக்கொண்டனர்.
காலி க்ளேடியேட்டர்ஸ் அணியின் பந்துவீச்சில், நுவான் துசார மற்றும் இமாட் வசிம் ஆகியோர் தலா 2 விக்கெட்டுகளையும் நிமேஷ் விமுக்தி 1 விக்கெட்டினையும் வீழ்த்தினர்.
இப்போட்டியின் ஆட்டநாயகனாக பந்துவீச்சில், 4 விக்கெட்டுகளையும் 52 ஓட்டங்களையும் பெற்றுக்கொண்ட தம்புள்ளை ஓரா அணி மெத்தியு போர்ட் தெரிவுசெய்யப்பட்டார்.
