இந்தோனேசிய கடற்படை நீர்மூழ்கிக் கப்பல் 53 பேருடன் காணாமல் போயுள்ளதாக இராணுவ அதிகாரிகள் தெரிவிக்கின்றனர்.
நீர்மூழ்கி கப்பல் நேற்று (புதன்கிழமை) பாலி தீவுக்கு வடக்கே பயிற்சியை மேற்கொண்டிருந்த போது, தொடர்பை இழந்ததாக அதிகாரிகள் தெரிவித்துள்ளனர்.
கே.ஆர்.ஐ.நங்கலா-402 கப்பலைக் கண்டுபிடிக்க போர்க்கப்பல்கள் அனுப்பப்பட்டுள்ளதாக இந்தோனேசியாவின் இராணுவத் தலைவர் தெரிவித்தார்.
அத்துடன், தேடலுக்கு உதவுமாறு அவுஸ்ரேலியா மற்றும் சிங்கப்பூருக்கு, அதிகாரிகள் அழைப்பு விடுத்துள்ளனர். எனினும், நாடுகள் பகிரங்கமாக கருத்து தெரிவிக்கவில்லை.
ஜேர்மனியில் தயாரிக்கப்பட்ட நீர்மூழ்கிக் கப்பல் புதன்கிழமை அதிகாலை பாலி கடற்கரையில் சுமார் 60 மைல் (100 கி.மீ) நீரில் காணாமல் போயுள்ளதாக கருதப்படுகிறது.
இதுகுறித்து அட்மிரல் ஜூலியஸ் விட்ஜோஜோனோ கூறுகையில், ‘கடற்படை தற்போது அதைத் தேடுகிறது. எங்களுக்கு அந்த பகுதி தெரியும், ஆனால் அது மிகவும் ஆழமானது’ என கூறினார்.
ஆழமான நீரில் மூழ்குவதற்கு நீர்மூழ்கிக் கப்பலுக்கு அனுமதி வழங்கப்பட்ட பின்னர் தொடர்பு இழந்ததாக சில தகவல்கள் கூறுகின்றன.
இந்தோனேசியாவால் இயக்கப்படும் ஐந்து நீர்மூழ்கிக் கப்பல்களில் இந்த கப்பலும் ஒன்றாகும்.
இது 1970ஆம் ஆண்டுகளின் பிற்பகுதியில் இந்த கப்பல் தயாரிக்கப்பட்டது. மேலும் தென் கொரியாவில் இரண்டு ஆண்டு மறுசீரமைப்புக்கு உட்பட்டு 2012ஆம் ஆண்டு பணிகள் நிறைவடைந்தது.
இந்தோனேசியா தனது நீர்மூழ்கிக் கப்பல்களில் ஒன்றை இழப்பது இதுவே முதல் முறை என்று கடற்படை செய்தித் தொடர்பாளர் தெரிவித்தார்.
ஆனால், இதே போன்ற சம்பவங்கள் வேறு இடங்களில் நடந்துள்ளன. 2017ஆம் ஆண்டில், அர்ஜென்டினா இராணுவ நீர்மூழ்கிக் கப்பல் தெற்கு அட்லாண்டிக்கில் 44 பணியாளர்களுடன் காணாமல் போனது.
அதன் சிதைவு ஒரு வருடம் கழித்து கிடைத்தது. இதன்பிறகு நீர்மூழ்கி கப்பல் வெடித்ததை அதிகாரிகள் உறுதிப்படுத்தினர்.
