இந்தியா மற்றும் நியூஸிலாந்து அணிகள் மோதிக்கொள்ளும் ஐ.சி.சி. டெஸ்ட் சம்பியன்ஷிப் தொடரின் இறுதிப் போட்டியின் மூன்றாம் நாள் ஆட்டம் நிறைவுக்கு வந்துள்ளது.
இதன்படி முதல் இன்னிங்ஸிற்காக துடுப்பெடுத்தாடிவரும் நியூஸிலாந்து அணி நேற்றைய மூன்றாம்நாள் ஆட்டநேர முடிவில் 2 விக்கெட்டுகள் இழப்புக்கு 101 ஓட்டங்களை பெற்றுக்கொண்டது.
ஆட்டநேர முடிவில், கேன் வில்லியம்சன் 12 ஓட்டங்களுடனும் ரோஸ் டெய்லர் ஓட்டமெதுவும் பெறாத நிலையிலும் களத்தில் உள்ளனர்.
இந்தியக் கிரிக்கெட் அணியின் முதல் இன்னிங்ஸ் ஓட்டங்களுடன் ஒப்பிடுகையில், நியூஸிலாந்து அணி 116 ஓட்டங்கள் பின்னிலையில் உள்ளது.
சவுத்தம்ப்டன் மைதானத்தில் கடந்த 18ஆம் திகதி ஆரம்பமான இப்போட்டியில், நாணய சுழற்சியில் வெற்றிபெற்ற நியூஸிலாந்து அணி, முதலில் களத்தடுப்பை தீர்மானித்தது.
இதன்படி முதலில் துடுப்பெடுத்தாடிய இந்தியக் கிரிக்கெட் அணி, முதல் இன்னிங்ஸிற்காக 217 ஓட்டங்களை பெற்றுக்கொண்டது.
இதன்போது அணியின் அதிகப்பட்ச ஓட்டங்களாக, அஜிங்கியா ரஹானே 49 ஓட்டங்களையும் விராட் கோஹ்லி 44 ஓட்டங்களையும் பெற்றுக்கொண்டனர்.
நியூஸிலாந்து அணியின் பந்துவீச்சில், கெய்ல் ஜேமீஸன் 5 விக்கெட்டுகளையும் ட்ரெண்ட் போல்ட் மற்றும் நெய்ல் வாக்னர் ஆகியோர் தலா 2 விக்கெட்டுகளையும் டிம் சவுத்தீ 1 விக்கெட்டினையும் வீழ்த்தினர்.
இதனைத்தொடர்ந்து பதிலுக்கு முதல் இன்னிங்சை தொடங்கிய நியூஸிலாந்து அணி, நேற்றைய முதல்நாள் ஆட்டநேர முடிவில் 2 விக்கெட்டுகள் இழப்புக்கு 101 ஓட்டங்களை பெற்றுக்கொண்டது.
இதில் டொம் லதம் 30 ஓட்டங்களுடனும் டெவோன் கோன்வே 54 ஓட்டங்களுடனும் ஆட்டமிழந்தனர்.
இந்தியக் கிரிக்கெட் அணியின் பந்துவீச்சில், இசாந் சர்மா மற்றும் அஸ்வின் ஆகியோர் தலா 1 விக்கெட்டினை வீழ்த்தினர்.
இன்னமும் 8 விக்கெட்டுகள் வசமுள்ள நிலையில், போட்டியின் நான்காவது நாளை நியூஸிலாந்து அணி இன்று தொடரவுள்ளது.
