2020ஆம் ஆண்டு யு.இ.எஃப்.ஏ யூரோ கிண்ண கால்பந்து தொடர், தற்போது விறுவிறுப்பாக நடைபெற்று வருகின்றது.
அந்த வகையில் நேற்று குழுநிலைப் போட்டிகளின் மூன்றாம் கட்ட போட்டிகள் நடைபெற்றன. இப்போட்டிகளின் முடிவுகளை பார்க்கலாம்.
ஒலிம்பிக்கோ விளையாட்டரங்கில் நடைபெற்ற போட்டியில், இத்தாலி மற்றும் வேல்ஸ் அணிகள் மோதின.
குழு ‘ஏ’யில் நடைபெற்ற இப்போட்டியில், இத்தாலி அணி 1-0 என்ற கோல் கணக்கில் வெற்றிபெற்றது.
இதில் இத்தாலி அணி சார்பில், மெட்டியோ பெஸ்ஸின்னா 39ஆவது நிமிடத்தில் அணிக்காக வெற்றி கோலை அடித்தார்.
இந்த வெற்றியின் மூலம் இத்தாலி அணி, அடுத்த சுற்றுக்கான வாய்ப்பினை உறுதிசெய்துள்ளது.
பகு ஒலிம்பிக் விளையாட்டரங்கில் நடைபெற்ற போட்டியில், சுவிஸ்லாந்து அணியும் துருக்கி அணியும் பலப்பரீட்சை நடத்தின.
குழு ‘ஏ’யில் நடைபெற்ற இப்போட்டியில், சுவிஸ்லாந்து அணி 3-1 என்ற கோல்கள் கணக்கில் வெற்றிபெற்றது.
இதில் சுவிஸ்லாந்து அணி சார்பில், ஹரிஸ் செபரோவிச் போட்டியின் ஆறாவது நிமிடத்தில் ஒரு கோல் அடித்தார். ஸெர்தான் ஷாகிரி போட்டியின் 26ஆம் மற்றும் 68ஆவது நிமிடங்களில் என இரண்டு கோல்கள் அடித்தார்.
துருக்கி அணி சார்பில், இர்பான் கஹ்வெசி போட்டியின் 62ஆவது நிமிடத்தில் அணிக்காக ஒரு கோல் அடித்தார்.
