மோட்டோ ஜிபி தொடரின் வெலன்ஸியன் கிராண்ட் பிரிக்ஸ் பந்தயத்தில், டுக்கார்டி அணியின் பிரான்செஸ்கோ பாக்னியா, முதலிடம் பிடித்துள்ளார்.
இளசுகளின் விருப்ப விளையாட்டாக இரசிக்கப்படும் மோட்டோ ஜிபி பந்தயம், ஆண்டுக்கு 19 சுற்றுகளாக பல்வேறு நாடுகளில் நடைபெறும்.
அந்த வகையில் ஆண்டின் இறுதி சுற்றான வெலன்ஸியன் கிராண்ட் பிரிக்ஸ் பந்தயம், நேற்று அல்கார்வ் சர்வதேச ஓடுதளத்தில் நடைபெற்றது.
இதில் பந்தய தூரத்தை நோக்கி, 21 வீரர்கள் மோட்டார் சைக்கிள்களில் சீறிபாய்ந்தனர்.
இதில், டுக்கார்டி அணியின் பிரான்செஸ்கோ பாக்னியா, பந்தய தூரத்தை 38 நிமிடங்கள், 17.720 வினாடிகளில் கடந்து முதலிடத்தை பிடித்தார். அத்தோடு முதலிடத்திற்கான 25 புள்ளிகளையும் அவர் பெற்றுக் கொண்டார்.
இதையடுத்து, டுக்கார்டி அணியின் ஜோர்ஜ் மார்டின், 2.478 வினாடிகள் பின்னிலையில் பந்தய தூரத்தை கடந்து இரண்டாவது இடத்தை பிடித்ததோடு, அதற்கான 20 புள்ளிகளையும் பெற்றுக்கொண்டார்.
இவரையடுத்து, டுக்கார்டி அணியின் ஜெக் மில்லர், 0,823 வினாடிகள் பின்னிலையில் பந்தய தூரத்தை கடந்து மூன்றாவது இடத்தை பிடித்தார். அத்துடன் இதற்கான 16 புள்ளிகளையும் அவர் பெற்றுக்கொண்டார்.
இதுவரை நடந்து முடிந்த சுற்றுப் போட்டிகளின் அடிப்படையில், யமஹா அணியின் ஃபேபியோ குவார்டாரோ ஐந்து வெற்றிகளுடன் 278 புள்ளிகளுடன் முதலிடத்தை பிடித்து சம்பியன் பட்டத்தை வென்றார்.
இதன்மூலம் 22 வயதான யமஹா அணியின் ஃபேபியோ குவார்டாரோவுக்கு இது முதல் சம்பியன் பட்டமாகும்.
டுக்கார்டி அணியின் பிரான்செஸ்கோ பாக்னியா நான்கு வெற்றிகளுடன் 252 புள்ளிகளுடன் இரண்டாவது இடத்தை பிடித்தார்.
சூசுக்கி அணியின் ஜோன் மிர், 208 புள்ளிகளுடன் மூன்றாவது இடத்தை பிடித்தார்.
சம்பியன் வீரரான யமஹா அணியின் வாலண்டினோ ரோஸி, தனது இறுதிப் பந்தயத்தில் 10ஆவது இடத்துடன் விடைப்பெற்றார்.
சம்பியன் வீரரான யமஹா அணியின் வாலண்டினோ ரோஸி, தனது இறுதிப் பந்தயத்தில் 10ஆவது இடத்துடன் விடைப்பெற்றார்.
ஏழு முறை சம்பியனான 42 வயதான வாலண்டினோ ரோஸி தனது ஓய்வை அறிவித்துள்ள நிலையில், அவருக்கு இன்னாள் மற்றும் முன்னாள் வீரர்கள், உலக பிரபலங்கள், உலக தலைவர் மற்றும் இரசிகர்கள் வாழ்த்து தெரிவித்து வருகின்றனர்.
