அயர்லாந்து கிரிக்கெட் அணிக்கெதிரான முதலாவது ரி-20 போட்டியில், தென்னாபிரிக்கா கிரிக்கெட் அணி 21 ஓட்டங்கள் வித்தியாசத்தில் வெற்றிபெற்றது.
இந்த வெற்றியின் மூலம் இரண்டு போட்டிகள் கொண்ட ரி-20 தொடரில் 1-0 என்ற கணக்கில் தென்னாபிரிக்கா அணி, முன்னிலைப்பெற்றுள்ளது.
பிரிஸ்டோல் மைதானத்தில் நேற்று (புதன்கிழமை) நடைபெற்ற இப்போட்டியில், நாணய சுழற்சியில் வெற்றிபெற்ற தென்னாபிரிக்கா அணி, முதலில் களத்தடுப்பை தீர்மானித்தது.
இதன்படி முதலில் துடுப்பெடுத்தாடிய தென்னாபிரிக்கா கிரிக்கெட் அணி, நிர்ணயிக்கப்பட்ட 20 ஓவர்கள் நிறைவில், 5 விக்கெட்டுகள் இழப்புக்கு 211 ஓட்டங்களை பெற்றுக்கொண்டது.
இதில் அணியின் அதிகப்பட்ச ஓட்டங்களாக, ரீஸா ஹென்ரிக்ஸ் 74 ஓட்டங்களையும் எய்டன் மார்கிரம் 56 ஓட்டங்களையும் பெற்றுக்கொண்டனர்.
அயர்லாந்துக் கிரிக்கெட் அணியின் பந்துவீச்சில், டெலானி 2 விக்கெட்டுகளையும் என்டி மெக்பிரைன் மற்றும் ஜோசுவா லிட்டில் ஆகியோர் தலா 1 விக்கெட்டினையும் வீழ்த்தினர்.
இதனைத்தொடர்ந்து 212 என்ற வெற்றி இலக்கை நோக்கி பதிலுக்கு களமிறங்கிய அயர்லாந்துக் கிரிக்கெட் அணியால், 20 ஓவர்கள் நிறைவில் 9 விக்கெட்டுகள் இழப்புக்கு 190 ஓட்டங்களை மட்டுமே பெற முடிந்தது. இதனால், தென்னாபிரிக்கா கிரிக்கெட் அணி 21 ஓட்டங்கள் வித்தியாசத்தில் வெற்றிபெற்றது.
இதன்போது அணியின் அதிகப்பட்ச ஓட்டங்களாக, டக்கர் 78 ஓட்டங்களையும் ஜோர்ஜ் டொக்ரெல் 43 ஓட்டங்களையும் பெற்றுக்கொண்டனர்.
தென்னாபிரிக்கா கிரிக்கெட் அணியின் பந்துவீச்சில், கேசவ் மஹாராஜ், வெய்ன் பார்னல் மற்றும் டப்ரைஸ் சம்ஸி ஆகியோர் தலா 2 விக்கெட்டுகளையும் லுங்கி ங்கிடி மற்றும் டுவைன் பிரிடோரியஸ் ஆகியோர் தலா 1 விக்கெட்டினையும் வீழ்த்தினர்.
இப்போட்டியின் ஆட்டநாயகனாக, 53 பந்துகளில் ஒரு சிக்ஸர் 10 பவுண்ரிகள் அடங்களாக, 74 ஓட்டங்களை பெற்றுக்கொண்ட ரீஸா ஹென்ரிக்ஸ் தெரிவுசெய்யப்பட்டார்.
