கால்பந்து உலகில் எல் கிளாசிக்கோ என அறியப்படும் பிரபல பார்சிலோனா மற்றும் ரியல் மெட்ரிட் அணிகளுக்கிடையிலான போட்டியில், ரியல் மெட்ரிட் சிறப்பான வெற்றியை பதிவுசெய்துள்ளது.
லா லிகா கால்பந்து தொடரின், 9ஆவது கட்டப் போட்டி, நேற்று (ஞாயிற்றுக்கிழமை) சாண்டியாகோ பெர்னாபு விளையாட்டரங்கில் நடைபெற்றது.
பெரும் எதிர்பார்ப்புக்கு மத்தியில் நடைபெற்ற இப்போட்டியில், ரியல் மெட் அணி 3-1 என்ற கோல்கள் கணக்கில் வெற்றிபெற்றது.
இதில் ரியல் மெட்ரிட் அணி சார்பில், கரீம் பென்ஸிமா போட்டியின் 12ஆவது நிமிடத்தில் ஒரு கோலும், ஃபெடரிகோ வால்வெர்டே போட்டியின் 35ஆவது நிமிடத்தில் ஒரு கோலும், றொட்ரிகோ 91ஆவது நிமிடத்தில் கிடைத்த பெனால்டி வாய்ப்பை பயன்படுத்தி ஒரு கோலும் அடித்தனர்.
பார்சிலோனா அணி சார்பில், பெர்ரான் டோரிஸ் 83ஆவது நிமிடத்தில் ஒரு கோல் அடித்தார்.
இதுவரை நடைபெற்று முடிந்துள்ள லா லிகா கால்பந்து தொடரின் போட்டிகளின் அடிப்படையில், ரியல் மெட்ரிட் அணி 25 புள்ளிகளுடன் முதலிடத்திலும், பார்சிலோனா அணி 22 புள்ளிகளுடன் இரண்டாவது இடத்திலும் உள்ளன.
