ஈரானின் இஸ்லாமிய ஆடைக் கட்டுப்பாட்டை அமுல்படுத்தும் பணியில் ஈடுபட்டுள்ள ஈரானின் ஹிஜாப் கண்காணிப்பு காவல் பிரிவு கலைக்கப்பட்டுள்ளதாக, அந்நாட்டின் அட்டர்னி ஜெனரல் ஜாபர் மான்டசெரி தெரிவித்துள்ளார்.
அறநெறி காவல் துறைக்கும், நீதித் துறைக்கும் எவ்வித தொடர்பும் இல்லை எனவும் அந்தப்பிரிவு இப்போது கலைக்கப்பட்டுள்ளது எனவும் அவர் மேலும் தெரிவித்தார்.
ஈரானில் இஸ்லாமிய மதச் சட்டங்கள் கடுமையாக அமுல்படுத்தப்பட்டு வருகின்றன. குறிப்பாக, வீட்டைவிட்டு வெளியில் செல்லும் 9 வயதுக்கு மேற்பட்ட பெண்கள் ஹிஜாப் அணிய வேண்டியது கட்டாயம்.
ஹிஜாப் மத உடைக் கட்டுப்பாடுகளை மக்கள் பின்பற்றுகிறார்களா என்பதைக் கண்காணிக்க 2006ஆம் ஆண்டு அறநெறிக் காவல் பிரிவை ஈரான் அரசாங்கம் தொடங்கியது. ரோந்துப் பணியில் ஈடுபடும் இந்தப் பிரிவுக்கு, உடை கட்டுப்பாடுகளை மீறுவோரைக் கைது செய்யும் அதிகாரமும் இருந்தது.
இந்நிலையில், கடந்த செப்டம்பர் 13ஆம் திகதி தெஹ்ரானில் பொது இடத்தில் சரியாக ஹிஜாப் அணியவில்லை என்று கூறி, 22 வயதான மாஸா அமினி என்ற இளம்பெண்ணை அறநெறி காவல் படையினர் கைதுசெய்தனர்.
காவலில் இருந்த அவரை காவல் படையினர் அடித்து, துன்புறுத்தி உள்ளனர். இதில் பலத்த காயமடைந்த அவர் 16ஆம் திகதி சிகிச்சை பலனின்றி உயிரிழந்தார். இந்த சம்பவத்தைக் கண்டித்து ஈரான் முழுவதும் பெண்கள் ஹிஜாப் அணியமறுத்து போராட்டத்தில் ஈடுபட்டனர். இதில் பங்கேற்ற பெண்கள் ஹிஜாபுக்கு எதிராகவும், அரசாங்கத்துக்கு எதிராகவும் குரல் கொடுத்து வருகின்றனர்.
இதனிடையே, போராட்டத்தை ஒடுக்க காவல் படையினர் மற்றும் பாதுகாப்புப் படையினர், தடியடி, கண்ணீர் புகை குண்டு வீச்சு, துப்பாக்கிச் சூடு உள்ளிட்ட நடவடிக்கைகளை மேற்கொண்டதில், 400க்கும் மேற்பட்டோர் உயிரிழந்ததாக மனித உரிமை அமைப்புகள் குற்றம்சாட்டியுள்ளன.
