தென்னாபிரிக்கா அணிக்கெதிரான இரண்டாவது டெஸ்டில் அவுஸ்ரேலியா அணி இன்னிங்ஸ் வெற்றி!

தென்னாபிரிக்கா கிரிக்கெட் அணிக்கெதிரான இரண்டாவது டெஸ்ட் போட்டியில், அவுஸ்ரேலியா அணி, இன்னிங்ஸ் மற்றும் 182 ஓட்டங்களால் அபார வெற்றிபெற்றது.

இந்த வெற்றியின் மூலம் மூன்று போட்டிகள் கொண்ட டெஸ்ட் தொடரில், 2-0 என முன்னிலைப் பெற்றுள்ள அவுஸ்ரேலியா அணி, தொடரையும் கைப்பற்றியுள்ளது.

மெல்பேர்ன் மைதானத்தில் கடந்த திங்கட்கிழமை ஆரம்பமான இப்போட்டியில், நாணய சுழற்சியில் வெற்றிபெற்ற அவுஸ்ரேலியா அணி முதலில் களத்தடுப்பை தீர்மானித்தது.

இதன்படி முதல் இன்னிங்ஸிற்காக துடுப்பெடுத்தாடிய தென்னாபிரிக்கா அணி, 189 ஓட்டங்களை பெற்றுக்கொண்டது.

இதில் அணியின் அதிகப்பட்ச ஓட்டங்களாக, மார்கோ ஜென்ஸன் ஆட்டமிழக்காது 59 ஓட்டங்ளையும் வெர்னைன் 52 ஓட்டங்களையும் பெற்றுக்கொண்டனர்.

அவுஸ்ரேலியக் கிரிக்கெட் அணியின் பந்துவீச்சில், கேமரூன் கிறீன் 5 விக்கெட்டுகளையும் ஸ்டார்க் 2 விக்கெட்டுகளையும் போலண்ட் மற்றும் லியோன் ஆகியோர் தலா 1 விக்கெட்டினையும் வீழ்த்தினர்.

இதனைத்தொடர்ந்து பதிலுக்கு முதல் இன்னிங்சை தொடங்கிய அவுஸ்ரேலியா அணி, 8 விக்கெட்டுகள் இழப்புக்கு 575 ஓட்டங்களை பெற்றிருந்தபோது தனது முதல் இன்னிங்ஸ் ஆட்டத்தை இடைநிறுத்திக்கொண்டது.

இதன்போது அணியின் அதிகப்பட்ச ஓட்டங்களாக, டேவிட் வோர்னர் 200 ஓட்டங்களையும் அலெக்ஸ் கெர்ரி 111 ஓட்டங்களையும் பெற்றுக்கொண்டனர்.

தென்னாபிரிக்க கிரிக்கெட் அணியின் பந்துவீச்சில், நோக்கியா 3 விக்கெட்டுகளையும் ரபாடா 2 விக்கெட்டுகளையும் லுங்கி ங்கிடி மற்றும் மார்கோ ஜென்ஸன் ஆகியோர் தலா 1 விக்கெட்டினையும் வீழ்த்தினர்.

இதனைத்தொடர்ந்து, 386 ஓட்டங்கள் பின்னிலையில் தனது இரண்டாவது இன்னிங்சை தொடங்கிய தென்னாபிரிக்க அணி, 204 ஓட்டங்களுக்கு சுருண்டது. இதனால். அவுஸ்ரேலியா அணி இன்னிங்ஸ் மற்றும் 182 ஓட்டங்களால் அபார வெற்றிபெற்றது.

இதில் அணியின் அதிகப்பட்ச ஓட்டங்களாக, டெம்பா பவுமா 65 ஓட்டங்களையும் கெய்ல் வெர்னைன் 33 ஓட்டங்களையும் பெற்றுக்கொண்டனர்.

அவுஸ்ரேலியக் கிரிக்கெட் அணியின் பந்துவீச்சில், நாதன் லியோன் 3 விக்கெட்டுகளையும் ஸ்கொட் போலண்ட் 2 விக்கெட்டுகளையும் மிட்செல் ஸ்டாக், பெட் கம்மின்ஸ் மற்றும் ஸ்டீவ் ஸ்மித் ஆகியோர் தலா 1 விக்கெட்டினையும் வீழ்த்தினர்.

இப்போட்டியின் ஆட்டநாயகனாக இரட்டை சதம் விளாசிய அவுஸ்ரேலியாவின் டேவிட் வோர்னர் தெரிவுசெய்யப்பட்டார்.