மறைந்த முன்னாள் நாடாளுமன்ற உறுப்பினர் முருகேசு சிவசிதம்பரத்தின் நூற்றாண்டு ஜனனதின நிகழ்வும் ஆவண நூல் வெளியீடும் நேற்று யாழில் இடம்பெற்றது.
‘தலைவர் சிவா 100’ எனும் தலைப்பில் யாழ், கரவெட்டி சம்பந்தர் கடையடி மகேசன் விளையாட்டுக் கழக மைதானத்திலேயே இந்த நிகழ்வு இடம்பெற்றது.
இதன்போது மறைந்த முன்னாள் நாடாளுமன்ற உறுப்பினர் சிவசிதம்பரத்தின் உருவப்படத்திற்கு மலர் மாலை அணிவித்து அஞ்சலி செலுத்தப்பட்டது.
யாழ்ப்பாணப் பல்கலைக்கழக பேராசிரியர் மிகுந்தன் தலைமையில் நடைபெற்ற இந்நிகழ்வில் தமிழ்த் தேசியக் கூட்டமைப்பின் நாடாளுமன்ற உறுப்பினரான எம்.ஏ.சுமந்திரன், ஸ்ரீலங்கா முஸ்லிம் காங்கிரஸின் தலைவர் ரவூப் ஹக்கீம், இலங்கை தமிழரசுக் கட்சியின் தலைவர் மாவை சேனாதிராஜா, முன்னாள் வடமாகாணசபை உறுப்பினர் சிவாஜிலிங்கம், முன்னாள் யாழ்.மாநக சபை முதல்வர் மணிவண்ணன் உள்ளிட்ட பலர் கலந்து கொண்டிருந்தனர்.
இந்த நிகழ்வில், ‘தலைவர் சிவா 100’ எனும் நூற்றாண்டு நினைவு ஆவண நூல் வெளியிடப்பட்டதுடன், தமிழர் விடுதலைக் கூட்டணியின் தலைவர் ஆனந்தசங்கரிக்கு நிகழ்வில் கௌரவமளிக்கப்பட்டது.
முன்னாள் நாடாளுமன்ற உறுப்பினர் சிவசிதம்பரத்தின் நூற்றாண்டு ஜனனதின நிகழ்வுகள், அன்னாரின் இல்லத்திலும், நெல்லியடியில் அமைந்துள்ள அவரது சிலையடியிலும் இடம்பெற்றன.
இலங்கைத் தமிழ் அரசியலில் நீண்டகாலமாக செயற்பட்ட முன்னாள் நாடாளுமன்ற உறுப்பினரான முருகேசு சிவசிதம்பரம், துணை சபாநாயகராகவும் 1968 முதல் 1970 வரை பணியாற்றியுள்ளார் என்பது குறிப்பிடத்தக்கது.
