அவுஸ்ரேலியக் கிரிக்கெட் அணிக்கெதிரான இரண்டாவதும் இறுதியுமான டெஸ்ட் போட்டியில், இலங்கை அணி இன்னிங்ஸ் மற்றும் 39 ஓட்டங்களால் வெற்றிபெற்றுள்ளது.
இந்த வெற்றியின் மூலம் இரண்டு போட்டிகள் கொண்ட டெஸ்ட் தொடர், 1-1 என்ற கணக்கில் சமநிலையில் முடிவடைந்துள்ளது.
காலி சர்வதேச மைதானத்தில் கடந்த வெள்ளிக்கிழமை ஆரம்பமான இப்போட்டியில், நாணய சுழற்சியில் வெற்றிபெற்ற அவுஸ்ரேலிய அணி, முதலில் துடுப்பெடுத்தாட தீர்மானித்தது.
இதன்படி முதலில் துடுப்பெடுத்தாடிய அவுஸ்ரேலிய அணி, முதல் இன்னிங்ஸிற்காக 364 ஓட்டங்களை பெற்றுக்கொண்டது.
இதில் அணியின் அதிகப்பட்ச ஓட்டங்களாக, ஸ்டீவ் ஸ்மித் ஆட்டமிழக்காது 145 ஓட்டங்களையும் லபுஸ்சேகன் 104 ஓட்டங்களையும் பெற்றுக்கொண்டனர்.
இலங்கை கிரிக்கெட் அணியின் பந்துவீச்சில், பிரபாத் ஜயசூரிய 6 விக்கெட்டுகளையும் ராஜித 2 விக்கெட்டுகளையும் ரமேஷ் மெண்டிஸ் மற்றும் மகேஷ் தீக்ஷன ஆகியோர் தலா 1 விக்கெட்டினையும் வீழ்த்தினர்.
இதனையடுத்து பதிலுக்கு முதல் இன்னிங்சை தொடங்கிய இலங்கை அணி, 554 ஓட்டங்களை பெற்றுக்கொண்டது.
இதன்போது அணியின் அதிகப்பட்ச ஓட்டங்களாக, தினேஷ் சந்திமால் ஆட்டமிழக்காது 206 ஓட்டங்களையும் கருணாரத்ன 86 ஓட்டங்களையும் குசல் மெண்டிஸ் 85 ஓட்டங்களையும் பெற்றுக்கொண்டனர்.
அவுஸ்ரேலியக் கிரிக்கெட் அணியின் பந்துவீச்சில், ஸ்டார்க் 4 விக்கெட்டுகளையும் ஸ்வெப்சன் 3 விக்கெட்டுகளையும் லியோன் 2 விக்கெட்டுகளையும் கம்மின்ஸ் 1 விக்கெட்டினையும் வீழ்த்தினர்.
190 ஓட்டங்கள் பின்னிலையில் தனது இரண்டாவது இன்னிங்சை தொடங்கிய அவுஸ்ரேலிய அணி, 151 ஓட்டங்களுக்கு சுருண்டது. இதனால், இலங்கை அணி இன்னிங்ஸ் மற்றும் 39 ஓட்டங்களால் வெற்றிபெற்றுள்ளது.
இதில் அணியின் அதிகப்பட்ச ஓட்டங்களாக, மார்னஸ் லபுஸ்சேகன் 32 ஓட்டங்களையும் உஸ்மான் கவாஜா 29 ஓட்டங்களையும் பெற்றுக்கொண்டனர்.
இலங்கை அணியின் பந்துவீச்சில், பிரபாத் ஜயசூரிய 6 விக்கெட்டுகளையும் மகேஷ் தீக்ஷன மற்றும் ரமேஷ் மெண்டிஸ் ஆகியோர் தலா 2 விக்கெட்டுகளையும் வீழ்த்தினர்.
இப்போட்டியின் ஆட்டநாயகனாக அறிமுக வீரர் பிரபாத் ஜயசூரியவும் தொடரின் நாயகனாக தினேஷ் சந்திமாலும் தெரிவுசெய்யப்பட்டனர்.
