ரி-20 உலகக்கிண்ண தொடரின் முதல் சுற்றுப் (தகுதிகாண்) போட்டியில், இலங்கை கிரிக்கெட் அணி 70 ஓட்டங்கள் வித்தியாசத்தில் வெற்றிபெற்று சுப்பர் 12 சுற்றுக்கு முன்னேறியது.
அபுதாபியில் நேற்று (புதன்கிழமை) நடைபெற்ற இப்போட்டியில், இலங்கை கிரிக்கெட் அணியும் அயர்லாந்து அணியும் பலப்பரீட்சை நடத்தின.
இப்போட்டியில் நாணய சுழற்சியில் வெற்றிபெற்ற அயர்லாந்து அணி முதலில் களத்தடுப்பை தீர்மானித்தது.
இதன்படி முதலில் துடுப்பெடுத்தாடிய இலங்கை கிரிக்கெட் அணி, நிர்ணயிக்கப்பட்ட 20 ஓவர்கள் நிறைவில், 7 விக்கெட்டுகள் இழப்புக்கு 171 ஓட்டங்களை பெற்றுக்கொண்டது.
இதில் அணியின் அதிகப்பட்ச ஓட்டங்களாக, வனிந்து ஹசரங்க 71 ஓட்டங்களையும் பெத்தும் நிஸங்க 61 ஓட்டங்களையும் பெற்றுக்கொண்டனர்.
அயர்லாந்து அணியின் பந்துவீச்சில், ஜோசுவா லிட்டில் 4 விக்கெட்டுகளையும் மார்க் அடாயர் 2 விக்கெட்டுகளையும் ஸ்டெயர்லிங் 1 விக்கெட்டினையும் வீழ்த்தினர்.
இதனைத்தொடர்ந்து 172 என்ற வெற்றி இலக்கை நோக்கி பதிலுக்கு களமிறங்கிய அயர்லாந்து அணி, 18.3 ஓவர்கள் நிறைவில் அனைத்து விக்கெட்டுகளையும் இழந்து 101 ஓட்டங்களுக்கு சுருண்டது. இதனால் இலங்கை கிரிக்கெட் அணி 70 ஓட்டங்கள் வித்தியாசத்தில் வெற்றிபெற்றது.
இதன்போது அணியின் அதிகப்பட்ச ஓட்டங்களாக, ஹென்ரிவ் பால்பிரையன் 41 ஓட்டங்களையும் கார்டிஸ் கம்பர் 24 ஓட்டங்களையும் பெற்றுக்கொண்டனர்.
இலங்கை கிரிக்கெட் அணியின் பந்துவீச்சில், மஹேஷ் தீக்ஷன 3 விக்கெட்டுகளையும் சமிக கருணாரத்ன மற்றும் லஹிரு குமார ஆகியோர் தலா 2 விக்கெட்டுகளையும் துஸ்மந்த சமீர மற்றும் வனிந்து ஹசரங்க ஆகியோர் தலா 1 விக்கெட்டினையும் வீழ்த்தினர்.
இப்போட்டியின் ஆட்டநாயகனாக 71 ஓட்டங்களையும் 1 விக்கெட்டினையும் வீழ்த்திய வனிந்து ஹசரங்க தெரிவுசெய்யப்பட்டார்.
