தென்மேற்கு வங்காள விரிகுடாவில் நிலவும் ஆழ்ந்த காற்றழுத்த தாழ்வு நிலை நாளையின் பின்னர் படிப்படியாக குறையும் என வளிமண்டலவியல் திணைக்களம் தெரிவித்துள்ளது.
இன்று காலை திருகோணமலைக்கு வடகிழக்கே சுமார் 110 கிலோமீற்றர் தொலைவில் நிலைகொண்டிருந்த ஆழமான காற்றழுத்த தாழ்வு பகுதி கிழக்கு கடற்கரையை அண்மித்து வடமேற்கு நோக்கி நகர்ந்து வருவதாக தெரிவிக்கப்படுகின்றது.
இதன்படி, நாட்டை சுற்றியுள்ள ஆழமான மற்றும் ஆழமற்ற கடற்பரப்புகளில் மீள் அறிவித்தல் வரை மீன்பிடித்தல் மற்றும் கடற்பயண நடவடிக்கைகளில் ஈடுபடுவதைத் தவிர்க்குமாறும் வளிமண்டலவியல் திணைக்களம் அறிவித்துள்ளது
இதேவேளை, வடமாகாணத்தின் சில இடங்களில் 100 மில்லிமீற்றருக்கும் அதிகமான பலத்த மழை பெய்யக்கூடும் எனவும், வடமத்திய, மேல், சப்ரகமுவ மற்றும் வடமேல் மாகாணங்களிலும் திருகோணமலை மற்றும் காலி மாவட்டங்களிலும் அவ்வப்போது மழை பெய்யக் கூடும் எனவும் தெரிவிக்கப்பட்டுள்ளது.
மேலும் வடக்கு, வடமத்திய, வடமேற்கு, மத்திய மற்றும் கிழக்கு மாகாணங்களில் மணிக்கு சுமார் 60 கிலோமீற்றர் வேகத்தில் பலத்த காற்று வீசக்கூடிய சாத்தியம் காணப்படுவதாகவும் வளிமண்டலவியல் திணைக்களம் தெரிவித்துள்ளது.
