இலங்கை அணிக்கெதிரான முதலாவது டெஸ்ட் போட்டியில், அவுஸ்ரேலியக் கிரிக்கெட் அணி 10 ஓட்டங்களால் அபார வெற்றிபெற்றுள்ளது.
இந்த வெற்றியின் மூலம் இரண்டு போட்டிகள் கொண்ட டெஸ்ட் தொடரில், 1-0 என்ற கணக்கில் அவுஸ்ரேலியா முன்னிலைப் பெற்றுள்ளது.
கடந்த 29ஆம் திகதி காலி மைதானத்தில் ஆரம்பமான இப்போட்டியில் நாணய சுழற்சியில் வெற்றிபெற்ற இலங்கை அணி முதலில் துடுப்பெடுத்தாட தீர்மானித்தது.
இதன்படி முதலில் துடுப்பெடுத்தாடிய இலங்கை அணி, முதல் இன்னிங்ஸிற்காக 212 ஓட்டங்களை பெற்றுக்கொண்டது.
இதில் அணியின் அதிகப்பட்ச ஓட்டங்களாக, நிரோஷன் டிக்வெல்ல 58 ஓட்டங்களையும் அஞ்சலோ மத்தியூஸ் 39 ஓட்டங்களையும் பெற்றுக்கொண்டனர்.
அவுஸ்ரேலியக் கிரிக்கெட் அணியின் பந்துவீச்சில், நாதன் லியோன் 5 விக்கெட்டுகளையும் ஸ்வெப்சன் 3 விக்கெட்டுகளையும் ஸ்டார்க் மற்றும் கம்மின்ஸ் ஆகியோர் தலா 1 விக்கெட்டினையும் வீழ்த்தினர்.
இதனைத்தொடர்ந்து பதிலுக்கு முதல் இன்னிங்சை தொடங்கிய அவுஸ்ரேலியக் கிரிக்கெட் அணி முதல் இன்னிங்ஸிற்காக 321 ஓட்டங்களை பெற்றுக்கொண்டது.
இதன்போது அணியின் அதிகப்பட்ச ஓட்டங்களாக, கேமரூன் கிறீன் 77 ஓட்டங்களையும் உஸ்மான் கவாஜா 71 ஓட்டங்களையும் பெற்றுக்கொண்டனர்.
இலங்கை கிரிக்கெட் அணியின் பந்துவீச்சில், ரமேஷ் மெண்டிஸ் 4 விக்கெட்டுகளையும் அசித்த பெணார்டோ மற்றும் ஜெப்ரி வெண்டர்சே ஆகியோர் தலா 2 விக்கெட்டுகளையும் தனஞ்சய டி சில்வா 1 விக்கெட்டினையும் வீழ்த்தினர்.
இன்றைய மூன்றாம் நாள் ஆட்டத்தின் போது, 109 ஓட்டங்கள் பின்னிலையில் தனது இரண்டாவது இன்னிங்ஸ் ஆட்டத்தை தொங்கிய இலங்கை கிரிக்கெட் அணி, 113 ஓட்டங்களுக்கு சுருண்டது. இதனால், அவுஸ்ரேலிய அணிக்கு 5 ஓட்டங்கள் வெற்றி இலக்காக நிர்ணயிக்கப்பட்டது.
இலங்கை அணியின் அதிகப்பட்ச ஓட்டங்களாக, திமுத் கருணாரத்ன 23 ஓட்டங்களை பெற்றுக்கொண்டார்.
அவுஸ்ரேலியக் கிரிக்கெட் அணியின் பந்துவீச்சில், நாதன் லியோன் மற்றும் ட்ராவிஸ் ஹெட் ஆகியோர் தலா 4 விக்கெட்டுகளையும் மிட்செல் ஸ்வெப்சன் 2 விக்கெட்டுகளையும் வீழ்த்தினார்.
5 ஓட்டங்கள் என்ற எளிய வெற்றி இலக்கை, அவுஸ்ரேலியக் கிரிக்கெட் அணி, எவ்வித விக்கெட் இழப்பின்றி கடந்து வெற்றியை பதிவுசெய்தது.
இப்போட்டியின் ஆட்டநாயகனாக அவுஸ்ரேலியக் கிரிக்கெட் அணியின் கேமரூன் கிறீன் தெரிவுசெய்யப்பட்டார்.
இரு அணிகளுக்கிடையிலான இரண்டாவதும் இறுதியுமான டெஸ்ட் போட்டி, எதிர்வரும் 8ஆம் திகதி காலி மைதானத்தில் நடைபெறவுள்ளது.
