நியூஸிலாந்துக் கிரிக்கெட் அணிக்கெதிரான முதலாவது ஒருநாள் போட்டியில், அவுஸ்ரேலியா அணி 2 விக்கெட்டுகள் வித்தியாசத்தில் வெற்றிபெற்றுள்ளது.
இந்த வெற்றியின் மூலம் மூன்று போட்டிகள் கொண்ட ஒருநாள் தொடரில், 1-0 என்ற கணக்கில் அவுஸ்ரேலியா அணி முன்னிலைப் பெற்றுள்ளது.
கெய்ர்ன்ஸ் மைதானத்தில் இன்று (செவ்வாய்க்கிழமை) நடைபெற்ற இப்போட்டியில், நாணய சுழற்சியில் வெற்றிபெற்ற அவுஸ்ரேலிய அணி முதலில் களத்தடுப்பை தீர்மானித்தது.
இதன்படி முதலில் துடுப்பெடுத்தாடிய நியூஸிலாந்துக் கிரிக்கெட் அணி, நிர்ணயிக்கப்பட்ட 50 ஓவர்கள் நிறைவில், 9 விக்கெட்டுகள் இழப்புக்கு 232 ஓட்டங்களை பெற்றுக்கொண்டது.
இதன்போது, நியூஸிலாந்து அணி சார்பில் அதிகப்பட்ச ஓட்டங்களாக, டெவோன் கோன்வே 46 ஓட்டங்களையும் கேன் வில்லியம்சன் 45 ஓட்டங்களையும் பெற்றுக்கொண்டனர்.
அவுஸ்ரேலியக் கிரிக்கெட் அணியின் பந்துவீச்சில், க்ளேன் மேக்ஸ்வெல் 4 விக்கெட்டுகளையும் ஜோஸ் ஹெசில்வுட் 3 விக்கெட்டுகளையும் ஸ்டார்க் மற்றும் செம்பா ஆகியோர் தலா 1 விக்கெட்டினையும் வீழ்த்தினர்.
இதனைத்தொடர்ந்து 233 என்ற வெற்றி இலக்கை நோக்கி பதிலுக்கு களமிறங்கிய அவுஸ்ரேலிய அணி, 45 ஓவர்கள் நிறைவில் 8 விக்கெட்டுகள் இழப்புக்கு வெற்றி இலக்கை கடந்தது. இதனால், அவுஸ்ரேலியா 2 விக்கெட்டுகள் வித்தியாசத்தில் வெற்றிபெற்றது.
அவுஸ்ரேலிய அணியின் அதிகப்பட்ச ஓட்டங்களாக, கெமரூன் கிறீன் ஆட்டமிழக்காது 89 ஓட்டங்களையும் அலெக்ஸ் கெர்ரி 85 ஓட்டங்களையும் பெற்றுக்கொண்டனர்.
நியூஸிலாந்துக் கிரிக்கெட் அணியின் பந்துவீச்சில், ட்ரெண்ட் போல்ட் 4 விக்கெட்டுகளையும் மெட் ஹென்ரி மற்றும் லொக்கி பெர்குசன் ஆகியோர் தலா 2 விக்கெட்டுகளையும் வீழ்த்தினர்.
இப்போட்டியின் ஆட்டநாயகனாக, 92 பந்துகளில் ஒரு சிக்ஸர் 10 பவுண்ரிகள் அடங்களாக ஆட்டமிழக்காது 89 ஓட்டங்களை பெற்றுக்கொண்ட கெமரூன் கிறீன் தெரிவுசெய்யப்பட்டார்.
